प्रश्नै प्रश्नको यो दुनियाँमा उत्तर चाहिँ गुगलसँग छ तर विशाल सूचनाको भण्डार गुगलको भरपुर फाइदा लिन केही तरिका भने जान्नै पर्छ ।
वेब सर्चको लागि गुगल प्रयोग गर्ने संसारका कूल इन्टरनेट प्रयोगकर्ताको ८० प्रतिशतमा तपाईं पनि पर्नु हुन्छ होला । त्यसो भए तपाईंले गुगलमा धेरै जसो के खोज्नु हुन्छ ? सूचनाको विशाल डाटावेश बोकेको गुगलको सर्भरबाट तपाईंले अत्याधिक फाइदा लिनु भएको छ त? हामीमध्ये कतिलाई त गुगलबाट के के समेत खोज्न सकिन्छ, अनि सही सर्च रिजल्टका लागि कसरी सर्च गर्ने भन्ने टीप्स एण्ड ट्रीक्स थाहा नहुन पनि सक्छ । आउनुहोस् आज हामी गुगलमा केही रमाइला अनि केही ज्ञानबर्द्धक सर्च गरौं।
१. कुन शहरमा कति बज्यो : गुगल सर्चमा एउटा उपयोगी फिचर छ । गुगलको सर्च बक्समा time टाइप गरेर शहरको नाम टाइप गर्यो भने त्यो शहरमा अहिले कति बज्यो भनेर थाहा पाउन सकिन्छ । जस्तै मलाई यतिखेर टर्कीको इस्तानबुलमा कति बज्यो भनेर थाहा पाउन मन लाग्यो । म गुगलको सर्च बक्समा time Istanbul टाइप गरेर इन्टर हान्छु । गुगलले मलाई इस्तानबुलको अहिलेको समय यसरी देखाइदिन्छ :
यसैगरी इस्तानबुलको ठाउँमा अन्य शहरको नाम हालेर तपाईं पनि ट्राइ गर्नुस् । काठमाडौंकै हेर्दा पनि हुन्छ । अब संसारको कुनै पनि शहरको समय थाहा पाउनु तपाईंले टाइम डिफरेन्सलाई जोड घटाउ गरिरहन परेन । न त कुनै सफ्टवेयर नै चाहियो ।
२. क्याल्कुलेटर : इन्टरनेटमा बस्दा बस्दै दिमागले गर्न नसक्ने तर सामान्य हिसाबकिताब गर्नु पर्यो भने पनि गुगललाई नै सम्झनुस् । जस्तो मलाई ६ सय १ को ३३ प्रतिशत कति हुन्छ भनेर थाहा पाउन मन लाग्यो । गुगलमा जाने, सर्च बक्समा टाइप गर्ने 33% of 601 । गुगलको इन्जिनले तत्काल हिसाब गरेर नतिजा दिन्छ ।
यी बाहेक गुगलमा तपाईं गणितका जोड (+), घटाउ (-), गुणा (*), भाग (/) प्रयोग गरेर सामान्य क्याल्कुलेशन गर्न सक्नु हुन्छ ।
गुगलकै प्रयोग गरी तपाईं तौल, वजन, लम्बाइ जस्ता मापनहरुको एकाइको पनि ज्ञान लिन सक्नु हुन्छ । मलाइ मेरो उचाई फिटमा थाहा छ तर मिटरमा थाहा छैन । मलाई मिटरमा थाहा पाउन मन लाग्यो भने अल्मलिनु पर्दैन । गुगलको सर्च बक्समा गएर 5.8 feet in meter टाइप गरेपछि गुगलले नै हिसाब गरेर मेरो उचाइ मिटरमा देखाइदिन्छ । यसरी :
यसैगरी तपाईं औंसमा कति ग्राम हुन्छ (ounce in gram), निश्चित माइलमा कति किलोमिटर हुन्छ (250 miles in kilometer)जस्ता धेरै कुरा गुगलको सर्च बक्समा टाइप गरेर इन्टर हानेकै भरमा थाहा पाउन सक्नु हुन्छ ।
३. मौसम : अहिले काठमाडौंको तापक्रम कति छ ? भोलि घाम लाग्ला कि बादल ? अब मौसमसम्बन्धी भरपर्दो जानकारीका लागि अन्त कतै धाउनु पर्दैन । यसको समाधान पनि गुगलमै छ । गुगलमा जाने र सर्च बक्समा weather टाइप गरेर शहरको नाम हान्ने । आउनुस् काठमाडौंकै मौसम हेरौं । weather kathmandu गुगल गर्दा यस्तो नतिजा आउँदो रहेछ । तापक्रम, हावाको गति, आद्रता मात्र होइन आउँदा ३ दिनका मौसम भविष्यवाणी समेत गुगलले सबैभन्दा माथि नै सचित्र देखाइदिन्छ ।
थुप्रै वेबसाइटको पेज भिजिट गरी गरी थाहा पाउनु पर्ने सूचनाहरु गुगलको एउटा सानो सर्च बक्सले एउटै पेजमा केही समयमा नै देखाइदिन्छ । काठमाडौंको मौसम त देखाउन त गुगललाई शुन्य दशमलव २३ सेकेण्ड मात्र लाग्यो रे । सूचना खोज्ने यो भन्दा सही र छिटो तरिका अरु केही होला त ।
४. शब्दकोष अर्थात डिक्स्नरि : काम गर्दा होस् या गफ गर्दा अंग्रेजी नभई हुन्न । हाम्रो दोस्रो भाषा अंग्रेजीका थुप्रै शब्दको अर्थ हामीलाई थाहा छैन । यसको लागि चाहिन्छ डिक्स्नरी । व्यक्तिगत कुरा गर्दा मेरो टेबलमा डिक्स्नरी पनि छैन, न त कम्प्युटरमा कुनै डिक्स्नरीको सफ्टवेयर नै छ । न त म कुनै अन्य अनलाइन डिक्स्नरीमा शब्दको अर्थ खोज्छु । म त अंग्रेजी शब्दको अर्थ हेर्न गुगल प्रयोग गर्छु । गुगलको सर्च बक्समा जाने define टाइप गरेर दुईटा थोप्लो (: कोलोन) हान्ने र अर्थ खोज्नु पर्ने शब्द टाइप गर्ने । गुगलले उक्त शब्दको अर्थ थुप्रै डिक्स्नरीबाट खोजेर एउटै पेजमा देखाइदिन्छ । जस्तै मैले गुगलमा define:military सर्च गर्दा यस्तो रिजल्ट आयो :
५. आफ्नै नाम : गुगलमा आफ्नै नाम सर्च गर्दा पनि रमाइलो हुन्छ । फाइदा पनि छन् । पब्लिसिटी र प्राइभेसी । यी दुबै कुरामा तपाईंको रेटिङ कस्तो रहेछ भन्ने थाहा पाउन आफ्नै नाम गुगल गर्ने । तपाईं फाट्टफुट् ब्लगिङ गर्नुहुन्छ, सोसल नेटवर्किङ मन पराउनु हुन्छ, तपाईंका खुबी र क्षमताका प्रचार र पहिचानमा ध्यान दिनुहुन्छ भने एकपटक आफ्नै नाम हानेर सर्च ठोक्नुस् । तपाईंका नाम जोडिएका कन्टेन्टहरुको मजा लिनुस् । थाहा पाउनुस् तपाईं इन्टरनेट संसारमा कत्तिको पपुलर हुनुहुन्छ ।
अब प्राइभेसीको कुरा तपाईंलाई आफ्नो अनावश्यक चर्चा मन पर्दैन, गोप्य जीवन मन पराउनु हुन्छ भने तपाईंले आफ्नो गोपनीयता कुन हद सम्म कायम छ भनेर थाहा पाउनु आफ्नै नाम गुगल गर्न सक्नु हुन्छ । यदि तपाईंको इच्छा बिपरित तपाईंका व्यक्तिगत जानकारी, इमेल ठेगाना, फोन नम्बर र तस्बिरहरु कहिँ कतै सार्वजनिक भएका छन् भने तपाईं त्यसलाई हटाउने बाटो अपनाउन सक्नुहुन्छ । त्यसैले गुगलमा आफ्नै नाम सर्च गर्दा रमाइलो पनि हुन्छ फाइदा पनि हुन्छ ।
र अन्त्यमा... माइक्रोसफ्ट, याहु, गुगल, या अन्य कुनै बहुराष्ट्रिय कम्पनीमा कुनै दिन जागिरको लागि अन्तर्वार्ता दिन जाँदा तपाईं सामू कठीन प्रश्न सोधियो भने तपाईं आत्तिनु पर्दैन र त्यसको उत्तर आउँदैन समेत नभन्नुस् । बरु निर्धक्क भएर भन्नुहोस्, ‘आइ क्यान गुगल द्याट (म त्यसबारे गुगल गर्न सक्छु) । मलाई लाग्छ परिवर्तित विश्वका ह्युमन रिसोर्सेज म्यानेजरहरुलाई यो जवाफ चित्त बुझ्नेछ ।
यो ब्लग www.nagariknews.com मा प्रकाशित भएको थियो